CY第一 田少跌出十大

【明報專訊】香港大學民意研究計劃噚日公布最新政治人物排名榜，不過呢個排名唔係計支持度，而係計知名度，由市民喺無提示情况下講出佢熟悉嘅政治人物。大家最熟悉邊個呢？第一位冇意外，係特首梁振英（CY），而令Emily感到意外嘅，係上次（去年11月）排行第八嘅自由黨田北俊跌出十大，並由前政務司長陳方安生取代第八位。


呢個調查喺本月8至14日做嘅，訪問咗1029人，結果顯示梁振英排第一，第二位同第三位分別係政務司長林鄭月娥同「長毛」梁國雄，而近排成日出嚟講政改嘅全國政協副主席、前特首董建華就升到第四位。


董建華升至第四

前特首曾蔭權排第五，上次排第四嘅新民黨主席葉劉淑儀就排第六，之後的4個排名，分別係立法會主席曾鈺成、陳方安生、立法會議員黃毓民同民主黨主席劉慧卿。