黃成智住天台屋「老婆養」

【明報專訊】民主黨黨員黃成智噚日開記者會宣布搞政改簽名行動。無政黨支持，黃成智話因為無錢租地方搞記者會，唯有借長沙灣元州邨內嘅居民協會辦事處開記者會，黃成智會後訴苦，話自己家生活好慳儉，同太太住喺一間300呎嘅天台屋，每個月都只係用6000蚊，「我老婆家養緊我」。


盼與民主黨保持兄弟關係

黃成智話本來住緊層樓，賣咗套現供個仔去美國讀書；之前自資開咗一間餐廳，但屬於社企，目前都要啲錢去經營。


黃成智喺會後繼續同記者傾偈，話希望可以同民主黨保持兄弟關係，又話有黨友都覺得佢多年來為民主黨犧牲唔少。佢就話自己過去曾經3次喺立法會選舉中讓位畀人，都算幾大犧牲，所以如果有人質疑佢對民主黨嘅支持，佢有啲難過。黃成智又慨嘆，中生代嘅聲音喺黨內愈來愈唔受重視。


黃成智話今個周末打算喺一份收費報章同一份免費報章刊登聯署廣告，預計整個聯署行動要用5萬蚊，「問准咗老婆」。


記者會吸引逾20個記者採訪，但因為地方太細，有一半記者要企喺雜物房聽。黃成智話自己只係普通黨員，所以借唔到民主黨總部，之前都有諗過喺立法會外搞，但因為天氣唔好，加上地點有啲尷尬，所以最終問朋友借居民協會辦事處用住先。