劉鳴煒：儲錢係個人選擇

【明報專訊】樓價高企，年輕人買樓愈來愈難，4月剛上任青年事務委員會主席嘅劉鳴煒，日前接受前主播張寶華嘅網台Goyeah.com訪問被問到呢個題目時，佢假設一個人月薪1.5萬元，問願唔願意「作出一啲犧牲」，例如「睇少啲戲、去少啲日本」，每月儲3000元首期，等待樓價跌先入市。劉鳴煒強調，「我哋唔好講買唔買到樓住，就算樓價跌番落嚟，你如果唔願意喺你個personal budget儲多啲錢，樓價跌幾多，你都係儲首期『有排』嘅」。但本身係華人置業大股東劉鑾雄之子嘅劉鳴煒，其言論就被指「離地」。


34歲嘅華置主席劉鳴煒噚日出席香港江蘇社團總會成立酒會時，就同Emily解釋佢嘅買樓論。佢話訪問嗰部分想帶出嚟嘅重點好簡單，「樓價幾高、幾低都好，都係有個儲首期嘅需要，咁儲首期就正如儲錢，儲錢就自然係要有些錢自然要擺埋一邊。咁每個人點儲錢，或儲唔到錢都好，呢個係個人選擇嚟」。講完呢句，劉鳴煒隨即講「多謝晒」。


趙國雄：家人趕都唔好搬

另一方面，長和執行董事趙國雄話，佢第一份工月薪2800元，每個月都儲到千幾蚊，勸勉年輕人唔好一畢業就諗住搬出去住，又話佢當年都係同阿媽住，可以慳好多，又笑笑口話屋企人「唔趕唔好走，趕都唔好搬，交租六七千，有排都儲唔到錢」。趙國雄又話，以前買樓做到九成半按揭，當然會易啲上到車，家要多幾年喇。