劉夢熊感嘆 拍錯手掌燒錯炮仗 投錯票箱撐錯老梁

【明報專訊】一場爆料風波，劉夢熊失去政協委員之職，更由支持梁振英選特首變成與梁反目成仇。「2013年1月8日，I記（廉署）來查我，話我呃人（東方明珠）。根本就係生安白造，無啲咁嘅事。」他口中的案件昨日已完結，但他對梁振英的怨恨仍未消解。「我家睇佢呢3年嚟嘅表現，就有種『拍錯手掌，燒錯炮仗，投錯票箱，撐錯老梁』的感覺」。


劉夢熊仍清楚記得與梁「最後一次單獨見面係2012年10月19日晚，喺禮賓府吃飯」。二人之後雖曾在國慶酒會同場出現，但「我唔會行近佢，佢都唔會行近我，所以無咩面阻阻」。劉說，「渡盡劫波兄弟在，相逢一笑泯恩仇。我可以有呢個情懷，但問題在於喺佢呢個人入面，我睇唔到有呢個風度」。


案件屬政治指控？ 「市民眼睛雪亮」

劉夢熊的辦公室雜物不多，只有數十本政商界的書及一張放在金黃色相架內的照片，「2012年3月4日，喺北京，當時大家都係度講緊習近平主席會先同梁營定唐營嘅人握手，就知道邊邊得。結果我代表梁營係第一個同主席握手嘅人，就係嗰時影嘅。」回想當年那一刻，劉沾沾自喜，其辦公室靠窗一角，至今仍然放着一本以梁振英肖像為封面的書，書名為《理想與責任 梁振英的競選歷程》。劉夢熊高調參與梁的競選，「要穩中求變，要適度有為。呢啲都合乎我哋對改變嘅期盼，所以我當時就瞓個身落去支持佢囉」。


劉梁分道揚鑣，劉稱始於廉署2013年1月8日對其展開調查。他認為廉署的指控子虛烏有，「我覺得好好笑，廉署兩年前攞走咗我部電腦，但結果一張紙都搵唔到。反而喺葉瑞娟嘅電腦度搵到50幾張。根本就係無證據嘅指控，咁人哋就會質疑背後動機囉」。他沒有直接回應案件是否屬政治指控，只說「市民嘅眼睛係雪亮嘅」。


劉曾多次暗示會隨時「爆大鑊」，到時候足以令梁倒台；兩年後的今天仍未引爆﹕「我只可以講畀你聽，任何我要做嘅事，必定會喺適當嘅時機做適當嘅事。只要對國家、對人民有利，我一定會做。暫時無可奉告。」劉把記者放在其身前的錄音筆往記者方向推。


懷疑梁「可唔可以做完呢個任期」

劉曾強調，爆料非因求官不遂，反指挺梁令他「受了很多委屈，失去很多」，更令女兒失去晉升機會。如今女兒已經轉職，而自稱是「普通老百姓」的劉則略帶怨氣苦笑說：「當年我幫佢（梁）由5%民意逐步升上去，但佢竟然連一封感謝信都無。一封都無！打爛我個女嘅飯碗連一句話都無問到，羅范佢哋都有打電話嚟問候我啦！」劉更推斷，「佢可唔可以做完呢個任期，我都有好大嘅疑問，更加唔好講連任」，希望「佢能夠放下咩時候都自我感覺良好……去反思自己在3年主政嘅所作所為」。


明報記者 章淑廉