深入泛民立會陣地 梁美芬派鬆綁書籤

【明報專訊】為咗令政改通過，經民聯立法會議員梁美芬噚日同助理深入泛民立法會陣地「洗樓」，派發自家印製嘅「齊來鬆綁」書籤，籲泛民支持政改。不過，泛民議員同助理就唔多受落，唔止請梁美芬「食檸檬」，仲質疑梁美芬嘅助理違反立法會規定，去咗所屬政黨以外嘅樓層。


除咗泛民，梁美芬亦有向建制派議員派書籤，佢叫自由黨鍾國斌幫手鬆綁，但鍾國斌反問，鬆咩綁呢？梁美芬就叫鍾國斌「自己意會」，最終鍾國斌都肯「袋住先」。


民主黨單仲偕見到梁美芬派書籤，乾脆直行直過唔理佢；公民黨毛孟靜就話會將助理收到嘅書籤集齊歸還。


梁美芬話會喺九龍西擺街站、派書籤。同屬一區嘅黃毓民話會反擊梁美芬，印10萬張「否決假政改、打倒偽政權、自己香港自己救」單張，喺九龍西設街站派發。黃毓民仲挑機話「叫李偲嫣嚟派啦」。梁美芬笑言，到時一個街站叫鬆綁，對家就叫綑綁，可能要攞剪刀去「剪咗佢」。