HKG報成立 高官泛民「擺上台」

【明報專訊】周融成立嘅網媒「HKG報」噚日舉行成立酒會，政改三人組未有出席，不過HKG報就準備咗政改三人組嘅紙牌公仔畀到場人士影相。周融仲即場公布佢哋網站「冇普選面孔」投票結果，得票最高3人由高至低係公民黨黨魁梁家傑、壹傳媒創辦人黎智英同工黨主席李卓人。周融話今次投票係「一人一票」，但每人可以無限次投票。


高靜芝支持 馮煒光送花籃

HKG報喺會展搞酒會，中央政策組全職顧問高靜芝現身支持，新聞統籌專員馮煒光亦送上寫有「為民喉舌」嘅花籃，自由黨同經民聯都有送花籃。另外，「正義聯盟」召集人李偲嫣以黑色短裙到賀，會展保安見到偲嫣BB亦好興奮，打量對方，細細聲話佢就係著校服扮學生妹嗰個「肥嘟嘟」。


周融噚日祝酒前話搞網媒要200萬至300萬，呼籲現場人士湊夠10個人，每人夾20至30萬，就可以成立網上傳媒，平衡「黃絲」嗰啲「影響」香港嘅聲音。周融仲喺台上好憤慨咁話，唔打就輸梗，呼籲台下人士整多個網媒，就可以多一個幫忙。