財爺做點心仔：推車唔易

【明報專訊】財政司長曾俊華似乎都鍾意扮鬼扮馬，早前試過去工聯會嘅「美食車」活動，仲幫手分食物畀人，噚日佢就同中電人員去到酒樓，化身「點心男」推車仔賣點心，據聞仲服務咗3、4枱客"口添"。其實曾俊華唔係貪玩，而係出席中電嘅社區活動「老友記歎早茶」，同班長者下午茶。
向來西化、愛飲咖啡嘅財爺去咗啟德郵輪碼頭一間酒樓，佢話好多時星期日都鍾意同家人飲茶，而噚日佢同中電總裁潘偉賢一齊做點心男，推住點心車派點心畀長者，　得佢哋幾開心。財爺喺facebook話估唔到點心車唔係咁易推。
中電12萬早茶券送3萬長者
中電呢個社區活動，會同14區區議員、四大飲食業商會、社福機構等合作，派發12萬張早茶券，畀約3萬名65歲或以上長者，請佢哋未來3個月喺區內超過160間酒樓飲4次早茶，免費歎茶之餘，亦鼓勵佢哋多啲出去行吓，擴闊社交圈子。