新社聯「一帶一路」作歌賀會慶

【明報專訊】新界社團聯會唔經唔覺成立30年，地區工作愈來愈犀利，噚日佢哋舉行30周年會慶，中聯辦主任張曉明、署理特首林鄭月娥同多名局長都有出席，非常畀面。新社聯話要響應內地提倡簡約，噚日無送紀念品畀一眾嘉賓，但同場就「發布」佢哋作嘅新歌，呢首唔係會歌，而係為內地同港府都好重視嘅「一帶一路」。


新社聯理事長陳勇話呢首歌喺前幾日凌晨3點先完成，自己有份做監製，仲搵咗音樂人向雪懷作詞，青年歌唱家鄭穎芬演唱，歌詞其中講到「一帶燃起我們和平希望 一路正是東西溝通橋樑」、「中國香港 跟國家一起追尋夢想」。呢首新歌咁配合國策，唔知會唔會成為新一代紅歌呢？


新社聯會長梁志祥話，新社聯成立時有4萬人，家已發展到有25萬會員，林鄭月娥致辭話，新社聯人才鼎盛，有雄厚實力，相信喺政改關鍵時刻尤其能發揮重大作用。