李國麟訪京會「跟大隊」

【明報專訊】「飯盒會」泛民議員繼續「向假普選說不」落區宣傳，噚日喺九龍東搞單車巡遊呼籲市民反對袋住先，一眾車手起步時齊齊戴好頭盔，衝過一條寫有「8．31框架」嘅巨型橫額，寓意「衝破」8．31框架，惟由於邨口車閘未開，車隊「衝破」框架後，搞咗一陣先成功「出閘」。不過都無損一眾車手士氣，就連多年無踩單車嘅飯盒會召集人梁家傑亦搖頭又尾擺地成功征服咗一小段斜路。


籲踩車就勿跟大隊

立法會全體議員獲邀5月31號（周日）再次衝出香港，去深圳見京官講政改，不過多名泛民議員就未講實去唔去，例如衛生服務界李國麟（Joseph）就話佢屆時會「跟大隊」。Joseph噚日亦有跟大隊落區宣傳，但佢就提醒Emily，踩單車要量力而為，切勿跟大隊。不過，噚日路線對Joseph嚟講應該無難度，原來佢後生時經常喺灣仔摩理臣山租單車，先踩去上環，再直剷去筲箕灣交車。