翟少搶包山喻政改

【明報專訊】有「公職王」之稱嘅資深大律師翟紹唐（翟少）之前加入咗前特首董建華嘅智庫「團結香港基金」，佢噚日就以基金會嘅研究諮詢委員會成員身分接受無綫節目《講清講楚》訪問，身為長洲人嘅翟少，仲好應節咁以長洲搶包山比喻政改。但搞搶包山嘅長洲太平清醮值理會主席翁志明就話，搶包山唔係咁適合同政改作比喻喇！


太平清醮值理會主席：性質唔同

翟少被問到應唔應該「袋住先」，佢話「連第一步都唔踏出，點樣向前行？」佢又話好似搶包山咁，唔可以話最底嗰層啲包畀人踩過晒就唔要，只係要最頂嗰個，「一步登天，咁係唔係可行呢？」

但翟少似乎唔太清楚搶包山點玩，長洲太平清醮值理會主席翁志明話，包山最頂嗰層嘅平安包值9分，中間值3分，底層值1分，所以參賽健兒會先搶晒最頂層嘅9分包先。理事話搶包山係比賽鬥高分，同政改性質唔同。