趙世曾兒子加入自由黨

【明報專訊】自由黨田北俊一向敢言，佔中期間甚至叫特首梁振英考慮辭職，結果被中央褫奪全國政協一職，不過事件就令佢同所屬嘅自由黨民望不斷上升，Emily聽聞，過去半年已有近100人加入自由黨，令現時黨員人數約有600幾個。主席鍾國斌（Felix）話加入嘅人，主要係欣賞自由黨對政府唔係事事say yes喎。


其中一個比較出名嘅新黨員，係富商趙世曾兒子趙式浩，Felix話，趙式浩私下不時都同人談論時事，有次同一個自由黨成員講起，對方就建議佢既然咁多意見，不如加入政黨，多個平台發表吓啦，Felix亦有同對方傾過，結果對方喺兩三個星期前就正式入黨。除咗趙式浩，亦有年輕人入黨，Felix話最近亦有個18歲喺港大讀法律嘅同學仔加入咗自由黨。


自由黨高調反對同性戀，而趙式浩家姐趙式芝就曾高調公開其同性婚姻，唔知趙式浩加入自由黨前有無事先同家姐傾吓？