史泰祖盼醫界選委綑綁式投5票

【明報專訊】愈接近政改表決，愈多火花四濺。醫學會最近做第3次政改民調，畀《杏林覺醒》發信批評醫學會會長史泰祖，唔理前兩次民調有逾半受訪者不支持8．31下政改方案嘅結果，認為史泰祖再做民調係想「保皇」。史醫生對Emily講，今次做民調係喺政府出咗方案之後，所以會做埋呢次終極民調。


史醫生話佢支持自由、民主，但同時亦唔想同國家、政府對立，佢對於現時嘅政治生態非黑即白、兩極對抗感到失望。佢話若政改可以通過，佢仲希望醫學界選委（30席），可仿效2012年特首選舉咁做綑綁式投票，齊齊投5票揀5個參選人，唔好投3票咁少。佢話咁樣做，可以令唔同政治光譜嘅人都有機會「出閘」成為候選人，唔會畀人咁易控制咗提名權，希望醫學界兩極對立嘅緊張氣氛亦得以緩和。


由政協常委、前政務司長唐英年擔任會長嘅江蘇社團總會，搵咗史泰祖做副會長，原來史醫生嘅鄉下喺江蘇省江陰市，有人話史醫生加入江蘇社團總會令佢親建制、保皇嘅形象更鮮明。


史醫生就話個會有好多個副會長，佢只係掛個名啫。有知情者話畀Emily知，做副會長係要捐錢嘅。