銀河新場玩500米激流

【明報專訊】銀河娛樂（0027）旗下銀河二期及澳門百老匯將於今日開業，小琴和一眾行家昨天在開幕前已一齊到場参觀，先睹為快。最正係嗰度除咗有人造沙灘天際浪園，還有一條500米長嘅激流，中間仲有一節激流穿過透明管道橫越庭園內嘅行人小徑，最為殺食。鍾意水上活動嘅朋友，又多啲嘢玩啦！


另在安排參觀賭場嘅環節，銀娛亦難得安排莊荷學員扮演臨記做莊做客，未開嘅新場都咁有人氣，攝記大佬即刻好唔得閒。其中一位係百老匯任職嘅荷官阿姐話，係度做荷，比佢做保安時人工高7000蚊澳門幣咁話。現時百老匯啲莊荷，有一半係新學員。有別於過往，由金都改裝成百老匯後，賭場由樓上搬落地下，亦為全澳首個設有落地玻璃咁通透嘅場，雖然銀河二期賭場面積較細，但四通八達，更加方便賭仔過來。


[小琴密語 email: piano@mingpao.com]