東江水50年儀式 港視演員任司儀驚艷

【明報專訊】不經不覺港人飲用東江水已經有50年，有人話港人要飲水思源，但社會上亦有聲音話東江水唔平，好似最新一份粵港兩地政府供水協議，未來3年市民要畀近135億元購水，即逐年加約6%。無論如何，供水50年都係值得紀念嘅日子，港府噚日就喺政府總部搞咗個「東江水供港50周年」紀念儀式，請到內地水利部長陳雷、廣東省長朱小丹，以及中聯辦主張曉明一齊出席。


儀式冠蓋雲集，但要數搶攝記眼球嘅，可能係女司儀，因為佢出場時，場內攝記傳出一陣「騷動」聲，行家都話面善，但又無人叫得出司儀個名。Emily於是四處打聽，原來唔少人喺港視劇集《導火新聞線》同《選戰》見過佢演出，司儀叫做何詠雯。


累計供水近230億立方米

講番個活動，特首梁振英話，即使內地喺乾旱時期，香港仍獲保證供水，體現廣東同胞對香港嘅特殊照顧和支持。朱小丹省長就話，50年來東江水供港工程累計供水近230億立方米，成為香港同胞主要水源，通過供水合作、經貿合作同埋人員交流，形容粵港兩地嘅兄弟情誼不斷增進。