葉建源「密晤」舊聞又上fb

【明報專訊】一眾立法會議員聽日將會去深圳同京官會晤講政改，會晤前夕，Emily噚日喺facebook發現有唔少人share一段新聞，話立法會教育界議員「密晤」中聯辦主任張曉明傾政改。咁堅？望真啲，原來係去年同一日嘅新聞。


韓連山：提吓大家上年發生過

Emily噚日朝早見到進步教師同盟韓連山等share上年葉建源「密晤」張曉明嘅新聞，只睇標題以為葉建源又密晤張曉明。呢啲post有唔少人畀like，更有人留言話葉建源係「鬼」。


事件愈傳愈黑，葉建源即刻喺facebook澄清絕無此事，相信係有人用facebook「當年今日功能」，重貼去年新聞而引起誤會，佢提醒大家要睇清楚新聞日期先。韓連山就同Emily講，佢facebook每日都會彈出去年今日嘅新聞，而佢自己share篇post時，已講得好清楚話「去年密晤，今年重演？」後面係有個問號，而佢share篇舊聞，都係提醒吓大家上年發生過件咁嘅事啫。