史力加之父設計「胡巴昂坪車廂」

【明報專訊】電影《捉妖記》導演、「史力加之父」許誠毅最近返咗嚟香港，為昂坪360設計咗兩款「胡巴纜車」（胡巴係電影主角），由本月16日開始穿梭東涌同昂坪，屆時市民只要畀多50蚊，就可乘搭及獲得《捉妖記》紀念品。


玩尋寶遊戲 蓋印仔換禮品

昂坪360董事總經理關敏怡上星期同許誠毅一齊見記者，關敏怡話，選乘「胡巴纜車」嘅旅客仲有機會獲得兩張《捉妖記》首映門票，多收嘅錢會全數轉贈從事本地創作嘅非牟利組織「非常香港」。另會擺放4隻高兩米嘅胡巴塑像喺纜車站同市集，畀大家拍照，並加入尋寶遊戲，只要喺昂坪市集集齊5個妖精蓋印，可換領胡巴公仔一隻或搖扇一把。


6月推20元長者優惠

講到內地旅客來港人次下降同埋五一黃金周纜車服務因維修暫停，會唔會影響昂坪360收入，關敏怡話無具體數字顯示營業額受到影響，強調公司嘅營運唔會只依賴某一地區。佢話2014年昂坪360客人183萬，平均每日5300人，51%來自歐美及亞洲，其次為大陸及澳門，佔31%，本港市民佔18%。公司會推出唔同優惠吸客，例如6月會推出長者20元搭纜車優惠。