有話說﹕為咗學位，你可以去到幾盡？

【明報專訊】升小戰幔隨着6月6號小一放榜又開始了。上期本刊就訪問咗一個叩門叩足11間嘅家長，佢甚至因為壓力而喺面試時喊咗出嚟。Happy Mama之前同幾間熱門小學校長傾過，有家長為咗增加叩門機會，早一年已經寄定portfolio，又係學校門口等校長放工，都係嗰句﹕為咗一個學位，你可以去到幾盡？


家長都面試 似見政府A.O

今時今日要準備叩門嘅，除咗仔女，仲有家長。唔少熱門小學都有面見家長嘅環節。以為只係同校長老師傾下偈，交流下教養心得就過關？有家長就爆料畀Happy Mama聽，有某熱門小學設有家長集體面試環節，幾對家長需要就某些議題來小組討論，其中一條題目係﹕「如果你嘅子女喺學校打爛咗同學一個價值十萬蚊嘅古董小提琴，你會點處理？」嘩，唔知仲以為係見緊政府A.O吖！


叩門可以只係為咗爭取一個學位，同時亦可以係一次好好嘅身教。Happy Mama想分享一個真人真事﹕有某學生因為升中面試表現太好，校長一時興起，叫埋佢父母入校長室一齊傾。原本學校亦從未提過有家長面試環節，所以呢對父母都好緊張。但最後校長都好滿意佢哋成家人，校長話﹕「我好想收你個細路，但我想坦白問，你哋將我間學校排第幾位？」成家人當場你眼望我眼，因為佢哋三個都知道，雖然好想入呢間學校，但只係排喺第二位。最後媽媽鼓起勇氣同校長講出事實，而校長就話﹕「好多謝你哋咁坦白，我亦都好坦白咁同你講，根據我哋學校嘅政策，排本校第二位嘅家長，我哋只可以放waiting list。」


為獲取錄撒謊 你會點做？

可能唔少家長覺得，嗰位媽咪咁就白白浪費咗一個機會。但Happy Mama反而好欣賞佢。縱然可能因為咁而無咗一個學位，但就即場身教，畀孩子睇到乜嘢係誠信同言行合一。呢啲好品格，係會陪住個小朋友一生一世嘅。