馬會獲有節制博彩認證

【明報專訊】馬會噚日宣布再泵錢去「平和基金」幫人戒賭，馬會話，由2015/16年度開始嘅4年度，每年撥款4500萬入基金，即係較2003年度成立時捐款額2400萬元多近一倍。馬會一面收賭款，另一面就撥錢幫人，話咁樣係推動「有節制博彩」，而估唔到嘅係呢種做法都有攞獎，令馬會最近獲「世界博彩協會（World Lottery Association）」頒發「有節制博彩」最高級別國際認證，話係亞洲第一家！


馬會喺2013/14年度業績，總投注額有1740.3億元，同時間馬會將部分收益撥作慈善及公益用途，平和基金係其中一項。平和基金由政府管理，主要工作係資助與賭博相關嘅學術研究、推行公眾教育活動，而基金亦透過轄下4間輔導及治療中心幫助病態賭徒戒賭。