賣殼雲鋒趙薇 高振順﹕唔識馬雲

【明報專訊】「低調殼王」高振順近期突然轉趨高調，繼先後沾手光啓科學（0439）、先豐（0500）及中國星文化（8172）等爆升股後，早前又將瑞東（0376）賣殼畀阿里巴巴主席馬雲有份創辦嘅雲鋒基金同藝人趙薇及其丈夫，再次點石成金，刺激瑞東日前股價急升一倍有多，不過高老闆噚日竟然話，無就雲鋒入主瑞東一事同馬雲溝通過，甚至話「我唔識馬雲」。


噚日瑞東股東會之後，一向低調嘅高老闆竟然企定定幾分鐘答記者問題。雖然靚殼已賣，不過高老闆話自己暫時仲會喺瑞東留任主席，如果大股東叫到，佢就繼續留任一段時間或者辭職都得，但係自己手上嘅瑞東股票就仲喺18個月鎖定期之內，所以都無賣到。對於瑞東股價爆升，佢就只係話股價「有上有落」。在場有記者話高生呢期好紅，高老闆就笑笑口，話自己係「十年磨一劍」，即係佢自己都好滿意自己今次交易，仲好享受喺鎂光燈之下？


email: piano@mingpao.com

[小琴密語]