開心工作間 播快樂能量

【明報專訊】打工仔當然希望做嘢做得開心。由生產力促進局同埋香港提升快樂指數基金舉辦嘅「開心工作間」計劃，今年踏入第3屆，至今有超過270間企業同機構參與，承諾會營造快樂嘅工作環境以提升員工快樂水平，噚日舉行頒發禮，場面都幾墟冚。


基金會長陳國民話，工作佔咗港人生活大部分時間，工作快樂與否好大程度影響港人整體快樂指數，期望愈來愈多企業同機構參與計劃後，可以將快樂正能量傳遞畀更多港人。


獲頒「開心工作間」標誌嘅企業同機構，需要喺過去一年就企業關愛、智慧、韌力及動力四大範疇，推行政策同活動。


其中一間獲頒標誌嘅係中電，其高級人力資源經理陳顯生話公司會推廣讚賞文化，提高員工工作動力，並且將男士侍產假增至5天，等員工喺工作同生活之間取得平衡。