梁美芬為消防處提草案肉緊

【明報專訊】經民聯梁美芬早前提出私人條例草案，修訂《消防安全（建築物）條例》，賦予消防處長酌情權，因應安全和緊急考慮，協助舊樓提升消防系統，事後追回費用。佢對呢件事相當肉緊，上星期三先同記者提完，噚日又約記者茶敘。梁博士話前幾日已經將草案同時轉交保安局長黎棟國，希望政府考慮自己提出草案，唔使分組點票。唔知神女有心襄王有無夢呢？


其實，梁博士呢個建議可謂十劃未有一撇，因為佢啱啱先將草案嘅中譯本交法律草擬專員，對方仲要發證明書。若當議員草案，按《基本法》，涉及公共開支、政府政策嘅草案又要問立法會主席同特首係咪同意。梁博士都坦言未開始拉票，目前只有經民聯議員落水支持呢個草案。


梁博士又引述2014年中同消防處會面時處方嘅數字，話當時一年處方向全港7400幢舊樓發出消防安全指示，當中九龍西佔2255幢，但油尖旺只有27幢能完成指令。好大原因係唔少業主都係清貧長者、移民或失蹤，真係「拉佢坐監都無用」，所以先建議賦予消防處長權力。