周永康岑敖暉現維園

【明報專訊】喺今年嘅支聯會維園六四晚會大台上，雖然見唔到大專生以學聯成員身分上台，不過，台下都見到唔少熟悉嘅面孔，好似學聯秘書長羅冠聰就以個人身分出席，前秘書長周永康同一班朋友一齊去，副秘書長岑敖暉就同女朋友何潔泓拍住拖去。但周、岑兩人唔知係咪「隱世」太耐，見到記者就走開，問題都唔答，連企定定畀大家影張相都唔肯。


周永康同岑敖暉一出現，有少女即聞風而至希望一睹兩子風采。而周、岑一見到記者追訪就慌失失咁周圍行，加上在場糾察唔准佢哋行捷徑，兩人擾攘咗一陣先混入大專學生堆中坐低。


學民籌款仍吸金力強

每年晚會，各大民主派政黨同民間團體都會喺銅鑼灣同天后一帶擺街站籌款賣紀念品，當中包括公民黨賣「生於亂世 有種責任」T恤、工黨賣「腰骨要直」摺櫈等。民主黨唔少成員就喺維園內外分頭嗌咪，為支聯會籌款。Emily噚日下晝近5點去咗觀察，發現學民思潮都係吸金力較強，籌款箱都有好多張100蚊「紅衫魚」。


支聯會喺場內都有唔少籌款箱，但似乎成績普通，去到夜晚集會開始之後，鄰近維園出入口嘅籌款箱都未滿。