澳洲導盲犬BB 7月來港

【明報專訊】黃色狗狗好懶瞓！黑色嗰兩隻似海參！佢哋4隻都係導盲犬BB嚟，出咗世都未夠一個月，將於7月由澳洲移民香港接受訓練，為日後帶領視障人士避開障礙物及引路做準備。領匯嘅慈善及社區參與項目「愛．匯聚計劃」，就捐助香港導盲犬協會推行「愛心引路」項目，從海外引入導盲犬BB喺香港受訓。領匯仲特登搞咗一項「導盲犬BB命名比賽」，希望員工各出其謀，為呢4隻來自澳洲嘅狗BB改番個好聽又易記嘅英文名。


領匯捐助 搞命名賽

香港導盲犬協會規定指明，受訓狗狗命名須按英文字母順序排列，方便日後追查狗狗嘅出生時間同來源地。好似呢4隻雌性拉布拉多幼犬咁，兩隻黃色幼犬嘅名要「F」開頭，黑色嘅兩隻就要用「G」字。但「Fire」或者「Go」呢啲名就可免則免，費事狗狗同視障者接收到錯誤信息。領匯就會成立10人遴選委員會幫幼犬揀名。


另外，漁護署鼓勵有意養寵物嘅市民領養，該署、香港兩棲及爬蟲協會、香港兔友協會和愛護動物協會喺6月6日及7日，上午11點至下午7點，喺荃灣愉景新城商場第一層天幕大堂舉行「寵物領養日」，有心人可以去睇睇，幫動物搵番個溫暖嘅家。