立會安檢 林大輝鋼牙「唔過關」

【明報專訊】立法會行管會之前通過，如果大樓有太多人聚集，會發出黃色同紅色警示，所有人包括議員同記者都要接受X光機同金屬探測器嘅安全檢查。秘書處噚日安排記者試下新嘅安檢安排，有記者試過，見金屬探測器算係幾敏感，就算記者袋裏面有電話、毫子都檢查到，需時有長有短。工業界議員林大輝（圖）噚日亦逃唔過金屬探測器「法眼」，佢笑笑口話，係因為口裏面有鋼牙先過唔到關。


秘書處同記者講，如果想快啲出入大樓，可以用靠近中信大廈一邊入口，因為嗰度有4組安檢設施，其中一組會安排畀記者專用，但如果近海嗰邊嘅公眾入口，就得一組安檢設施。秘書處強調一視同仁，若黃色同紅色警示生效，「全人類」都要安檢。


有記者就笑笑口問秘書處人員，如果特首梁振英同警察嚟又使唔使安檢呢？秘書處人員就無正面回應。