阿里影業打造中國荷里活

【明報專訊】獲阿里巴巴入主嘅阿里影業（1060）前日大抽水120億元，噚日就召開股東會。小股東就引述管理層話，公司要拍一啲可以媲美荷里活嘅電影。嗰頭阿里巴巴主席馬雲先話想做「中國彭博」，呢頭阿里影業就要成為「中國荷里活」，夾晒口供。


小股東仲話，管理層表明今次配股係用喺娛樂傳媒業務，以電影、IP（知識產權）、O2O（線上線下）為重點，希望喺全球物色導演、演員，但暫時未有計劃買戲院或者經營相關業務，因為主力要做O2O，但而家就有潛在收購目標。至於在場嘅非執行董事李連杰就無開過口。


雖然管理層未有透露有咩具體計劃，但有位股東就好有信心咁話，佢入股係睇未來5至10年發展，到時搞得起，回頭睇返就會覺得現價平。有記者問另一股東張先生覺得阿里影業幾時有盈利，張生就話：「有盈利的話就沒錢賺，它的股價不會升嘛！」


[小琴密語 email: piano@mingpao.com]