積金局搵工會主席拍片唱好

【明報專訊】香港有唔少打工仔質疑強積金制度收費高但回報少，積金局早前就搵咗4個僱主同僱員，拍咗幾條宣傳短片講吓強積金有咩好處，當中有個男主角係飲食業職工總會主席兼酒樓點心師傅郭宏興，佢話飲食行業以往根本無退休保障，家有強積金條例之後最起碼「清清楚楚」，僱主唔供就違法，但佢話呢行流動大，唔少人都可能有幾個積金戶口，自己都係近期先由5個整合番做1個。


4短片耗資約80萬

郭宏興話以前飲食業無乜勞工保障，想搵份星期六、日嘅酒樓替工做，都要逢星期五無償返工，「等老細覺得你可以，先會正式請你」。強積金實行初期，唔止有僱主講明唔供款，唔少工友覺得出少咗糧而抗拒，但同行現時適應咗，僱主唔肯供款情况亦愈來愈少見。


今次拍出嚟嘅4條長約1分鐘短片，耗費總共約80萬元，4個主角分別係興哥、建築工榮哥，亦會有80後年輕人同企業僱主，亦有30秒精華版本，今日起於電視同YouTube播出。