阿董基金製奮鬥宣傳片

【明報專訊】「寧願奮鬥到百千次，創出幸福快樂鄉……」前特首、全國政協副主席董建華牽頭嘅「團結香港基金」有新搞作，今次落重本製作一齣電視宣傳片，鼓勵大家喺呢個歷史時刻應團結一心，包容體諒喎。呢條片拍攝手法似MV，仲搵嚟近期主唱《高山低谷》而人氣高漲嘅歌手林奕匡，喺片中翻唱甄妮懷舊金曲《奮鬥》。MV出現嘅人物都好勁，包括《五個小孩的校長》電影真人版呂麗紅校長、亞運單車金牌得主黃金寶等，齊呼籲大家手挽手跨步向前。


9名人出場 包括呂麗紅校長

團結香港基金噚日就公布宣傳大計，包括推出《心聲篇》文章及廣告《奮鬥篇》，搵嚟各界特別人物為香港打氣。短片嘅9個勵志人物，包括已屆99歲高齡仍然自食其力嘅雪糕小販黃廣、呂麗紅、前亞洲攀石錦標賽冠軍嘅長洲包山王黎志偉、金像獎最年長最佳女配角陳麗雲、黃金寶、前女飛魚蔡曉慧、世界業餘桌球錦標賽女子組冠軍吳安儀、香港三項鐵人冠軍曾進傑，以及天台都市農莊創辦人林世昌。


呢段47秒嘅MV攝製認真，究竟花咗幾多成本及廣告費要幾多，基金會就不便透露，而3家電視台今晚起會播放MV，大家有興趣可上網睇（http://www.youtube.com/watch?v=no3D4kYUiuc）。