「文物醫生」義診 名額200 下周截止報名

【明報專訊】唔少市民都喺屋企收藏好多舊物，例如書畫、照片、銀器、硬幣等，承載好多回憶，但係隨住歲月流逝呢啲舊物都會破損，甚至殘缺不全。康文署轄下嘅文物修復辦事處，喺本月27號至7月12號嘅星期六及星期日將會舉辦「珍藏上醫館」活動，破天荒派出「文物醫生」免費幫市民「應診」，到時市民可帶損毁嘅舊物到辦事處「睇症」，職員會提供15分鐘諮詢同狀况診斷服務，之後市民仲可以喺文物修復實驗室30分鐘「臨牀實習」，為自己珍藏已久嘅舊物嘗試親自做修護，熟練咗技巧之後，以後就知道點可以妥善保存同修復珍藏。今次活動名額200個，本月18日（下周四）就會截止報名。


達德公所成功復修

講開又講，文物修復辦事處現時有30幾名修復人員，近期成功修復咗有150幾年歷史、屬法定古蹟嘅屏山達德公所，包括將原先發霉破爛嘅木門，尋找同類木材後接駁修復。木門原有嘅門神圖案，亦因為過去水患，顏料剝落得八八九九，辦事處以科學分析顏料物質，確定顏料成分係真金而唔係普通金漆之後，再用金箔鋪上去，重現門神圖案，整個過程花咗近一年。