有話說﹕升學專家教你叩門3招

【明報專訊】小一放榜結果終於喺上個周末塵埃落定。難為不少家長天時暑熱都要四出撲叩門位，真係可憐天下父母心。申請完叩門，家長最緊張當然就係點準備嚟緊嘅面試。Happy Mama八到，不少熱門小學都有面見家長嘅環節。家長表現會影響子女叩門機會，唔怪得個個都在網上討論區交流備戰心得。


Happy Mama早排撞到升學專家趙榮德，當然第一時間捉住佢，嗱嗱聲叫佢過番兩招畀家長。佢就醒咗以下三招﹕


第一式﹕夫妻同心，其利斷金

不少熱門小學都只係話家長需參與面見環節，但又無講明由父親抑或母親參與。趙sir教路，要表達最大入學誠意，最好就係夫婦同行﹕「大部分學校都好着重家校合作，父母同行就充分表現出呢個家庭非常願意配合學校，誠意分亦會加唔少。」


第二式﹕知己知彼，百戰百勝

好多家長一叩門就叩十間八間，有時真係會搞到亂晒。趙sir話，家長最少在面試前上網睇一次當局有份參與編製的《小學概覽》，了解目標學校的辦學理念同特色。最好就上埋學校網頁睇學校的「周年發展計劃」，了解目標學校的關注事項，自己的子女又可以點配合。準備充足，自然可以在校長心目中留下好印象啦。


第三式﹕寫信明志，錦書託願

其實好多時個個家庭嘅面試表現都差唔多，究竟點樣先可以突圍而出呢？原來秘訣就在於一封感謝信。趙sir話﹕「其實無論係咪真係可以加分，我都會建議家長出於禮貌喺面試後寫返封感謝信畀校長，多謝對方抽時間同自己見面。有時可能兩個學生表現差不多，有寫信嗰位，梗係會容易留下深刻啲嘅印象啦。」


Happy Mama都好明白家啲父母好緊張自己仔女嘅升學，不過家長都要適當調節自己的心情，以免得咗個學位，但影響親子關係呀！