新聞類別
財經
詳情#
【明報專訊】莊士（0298）太子爺莊家彬同傅明憲嘅9年情，一直有人話，家彬老竇莊紹綏唔like傅明憲離過婚，一早表明唔會畀佢入門，仲傳出話佢老人家要踢個仔出莊士董事會嚟迫佢哋分手，點知當家彬同傅明憲早排宣布「玩完」後，莊士噚日即刻公布，家彬升職做董事總經理職位，係咁啱定點，大家自己諗嘞。
呢段相差11年嘅姊弟戀，九年嚟女方一直無名無份。兩個人3個月前分手後，呢個月初家彬就帶埋新女友程新惠出嚟見人，仲公開承認同程新惠拍緊拖，呢位新女友從事幕後經理人，同中港台三地藝人仲好熟添！家彬話，時間許可嘅話，會帶女友見家長，同之前同傅明憲閃閃縮縮嘅戀情相比，真係一個天一個地。
感情嘅世界好複雜，想當年傅明憲同海域系老闆葉劍波結婚成為闊太，到2006年海域爆煲後，傅明憲同要坐監嘅葉劍波離婚，點知同莊家彬九年情又就咁玩完，真係「莫道你在選擇人，人亦能選擇你」。
email: piano@mingpao.com
[小琴密語]
回應 (0)
