元代景教銅十字展

【明報專訊】基督教早於唐代已經傳入中國，當時叫做景教，意思係「光明嘅宗教」，去到元代，景教信徒以銅十字作為信物，將佢哋綁喺衫或者腰帶上面，就好似基督徒會戴十字架一樣。香港大學內嘅美術博物館噚日就開始展出700件銅十字，公眾可以免費欣賞。


景教傳入中國後，唐武宗年間發生「會昌滅佛」事件，牽連景教令佢衰落，直至元代先至再次傳入，連同天主教統稱「也里可溫教」，係「有福分嘅人」咁解。


港大美術博物館一直收藏近千件元代鑄造嘅景教銅十字，係世上最大批景教銅十字收藏品，直徑由3至8厘米不等，但唔好以為個個銅十字都一樣，佢哋有啲係雀仔、魚、太陽嘅形狀；當年景教傳入中國時，為咗令信徒容易理解，都有借用佛教語言嚟解釋經文，兩者關係非常密切，所以唔少銅十字中間都有佛教「卍」字符號。


有興趣嘅朋友可以去港大參觀，逢星期四下晝1點會有公眾導賞，如果有興趣深入探究，今個禮拜六下晝3點都可以去現場聽「東遊記：唐元代中國基督教派」講座，由景教專家、本港亞洲路德宗神學院教務長唐健倫同你分享更多。