迪士尼新冰雪小鎮 有冰玩

【明報專訊】《魔雪奇緣》令迪士尼大賺，Emily噚日率先去左迪士尼新開嘅《魔雪奇緣》冰雪小鎮，小鎮開放日期由6月11號到8月31號。


表演無繁體字幕 首日過百入場

入場後首先去睇「夏雪節盛演」，聽Elsa大唱Let it go，現場嘅小朋友投入到企晒起身跟住一齊唱。不過弔詭嘅係，主角Elsa同Anna就講英文，而兩個配角就講廣東話，台兩邊顯示屏又淨係得簡體字同英文，問番負責人無繁體字嘅原因，佢話要查清楚先答到。


聽完歌，成班觀眾大約有半個鐘時間喺小鎮入面玩，個館話話可以容納到300人，但係現場逼到好似連行路都有困難。其中「雪橇練習場」嘅滑冰梯，5歲以上都可以玩，而3至5歲既小朋友要家長陪埋先可以玩。由梯頂滑落嚟只得3秒時間，都幾刺激。


另外有個場叫「夏雪節廣場」就成地碎冰，小朋友玩得開心，有媽媽話見到啲鞋喺冰上面踩嚟踩去，雖然開心，但下次玩之前會考慮下。工作人員話每場會鋪新嘅冰，應該唔會太污糟。新館第一日開，已有百幾人係出面等入場。