反政改特刊《袋條毛》派街坊

【明報專訊】政改嘅宣傳戰進入白熱化階段，民主黨噚日就推出咗本《袋條毛》特刊，用漫畫等得意手法解釋點解要否決政改方案，除咗個名同字體似「100毛」，仲大玩無綫劇《大時代》嘅概念，個場景似丁蟹將啲仔掟落街嗰幕。不過丁蟹個角色變咗漫畫版劉夢熊，而劉夢熊抱住嘅係特首梁振英。Emily問過民主黨創意媒體部長黎敬瑋，佢解釋封面構思，話劉夢熊之前講過支持錯咗CY，仲話會爆CY大鑊，所以大家都等緊佢爆啲堅料出嚟。


特刊內容包括玩6個「2017疑似候選人」，裏面有漫畫版嘅梁振英、葉劉淑儀、梁錦松、范徐麗泰、李國章同田北俊，仲幫佢哋每個人設計咗絕技，好似CY絕技係「指鹿為馬」、「過橋抽板」，李國章嘅絕技竟然係「叫我校長」，范太就有招「不甘寂寞」，都幾搞鬼。


黎敬瑋話，上次《選條毛》特刊印咗3版，派咗差唔多10萬份，所以今次《袋條毛》第一版已經印8萬份，噚日開始喺香港各區街站免費派發。