顏汶羽接任青民聯主席

【明報專訊】加入18區代表 強化地區發展

新一屆青年民建聯噚日見記者，為咗強化地區發展，佢哋今年仲加入18區地區代表，仲揀咗喺太陽最猛烈嘅正午喺戶外搞記招，話要用汗水灌溉社區喎。新一屆青年民建聯主席由觀塘區議員顏汶羽接替周浩鼎出任。顏汶羽話，今屆青年民建聯會搞一啲新穎啲嘅活動，例如早排就一齊睇歐聯決賽。


世界盃外圍賽中國隊同港隊未開波先用海報互相開火，顏汶羽話，佢哋亦設計咗款「一國之下，我有己見」嘅海報回應，話香港係多元社會，應該互相尊重，仲叫一眾兄弟姊妹喺facebook換做profile picture㖭。


奏國歌傳噓聲 「國歌始終要尊重」

前日港隊對不丹，奏國歌時場內觀眾噓聲四起，唔知又可唔可以「一國之下，我有己見」呢？顏汶羽就話，國歌始終要尊重嘅。