北區大埔無戲院 文娛中心播戲有得搞？

【明報專訊】Emily聽過唔少新界北區同大埔嘅居民呻區內無戲院，特首梁振英喺施政報告都話要考慮預留空間發展電影院，不過工聯會鄧家彪（Bill）同Emily呻，政府只喺啟德同西九等重點區預留土地起戲院，回應唔到北區、大埔無戲院嘅問題，希望政府可以將戲院重新納入規劃標準嘅文娛措施，前排佢就同戲院商會搞咗個記招。


根據政府之前回覆立法會文件，全港戲院由2005年57間跌至2014年47間。阿Bill話，北區、大埔、沙田一共有120多萬人口，但3區只有兩間戲院提供956個座位，嚴重不足。阿Bill話，聽聞政府初步透過社區協作，喺地區文娛設施搞放映會，定期播本土製作電影，不過地區文娛設施始終唔同戲院。


戲院商會副理事長崔顯威就係咁呻，戲院1990年代高峰時期有190間，同家簡直係天同地比，希望未來可以做到18區都可以有戲院。


戲院商會咁想推動電影文化，咁戲飛又有無得減價呢？崔顯威話佢哋未傾過。