田少贏「第689場」頭馬

【明報專訊】早前被褫奪全國政協一職嘅自由黨榮譽主席田北俊於政壇未必事事如意，但噚日就肯定馬場得意喇。佢同老婆養嘅新馬「人民武士」，喺賽馬日頭場跑第一，個人捧走約32萬元獎金，風騷嘅田少噚晚即喺facebook上載拉頭馬嘅相，原來佢贏頭馬嘅賽事，係今個馬季第689賽事，即係田少今日贏咗689……場馬，連田少自己都話「乜咁啱呀？！」


田﹕乜咁啱呀

田少噚日仲請一班唔識嘅人同佢一齊拉頭馬，佢話因為對方同佢喺觀眾席度一齊嗌，為隻馬打氣，佢話「話明係人民武士，當然要與人民同樂！」但有社運友就講笑話，唔通田少都係人民力量fans，所以將隻馬改名叫「人民武士」？其實，過去田少養過逾10隻馬，名字都有武士，好似「新東武士」、「幸運武士」咁。