6月客量跌 旅局推4億抽獎

【明報專訊】6月係旅遊淡季，今年仲要撞正韓國爆發新SARS，韓國客係香港主要客群之一，旅遊業話唔多唔少有啲影響，搞到旅客數字係咁跌。商務及經濟發展局長蘇錦樑話，6月頭14日來港旅客比舊年跌0.9％，即使內地客升0.9％，但海外客就跌6.2％。


在機場送出240萬份禮物

為咗吸番啲客，旅發局噚日開始一連78日喺機場推出「香港FUN享夏日禮」，送出240萬份禮物，當中有飲有食有得玩，總值4億元，包保旅客人人有份。其中有新加坡旅客噚日就攞咗銀聯卡1000港元簽帳額，另有澳洲客抽到麗星郵輪4日3夜豪華郵輪假期套票。


其實上月海外客跌0.9％，根據蘇錦樑噚日講嘅數字，跌勢仲未停，本月海外客暫跌6.2％。蘇錦樑仲話，長途旅客短期內唔會升，相信受歐美不明朗因素影響。至於受新SARS影響嘅韓國客，蘇錦樑話韓國客計劃來港所需嘅時間短，若疫情有改善，料市場會恢復得好快。