銅鑼灣避風塘 想搞水上活動區

【明報專訊】銅鑼灣避風塘可以畀人划艇、游水？發展局近年積極喺各區海濱搞搞新意思，噚日就展開咗「灣仔北及北角海濱城市設計研究」嘅首階段公眾諮詢，為期兩個月。當局話今次海濱規劃嘅願景係推廣親水文化，拉近人同水嘅距離，並保存北角社區、銅鑼灣避風塘等歷史，所以設計咗5個主題區（見圖）。


海濱研究首階段諮詢公眾

Emily留意到，最有趣係想喺銅鑼灣避風塘同前公眾貨物裝卸區對出水域搞個新水上康樂主題區，同香港遊艇會互相配合，仲話想引入水上康樂活動、浮動泳池同體育設施，又有下水台階同木板走道；又研究公眾用吊橋進出該處防波堤得唔得。至於北角就會搞個東岸公園，有機會連接維園。


另外Emily知道政府啱啱完成海濱管理局第二階段公眾諮詢，其實早前聽聞過，因為今年《施政報告》對成立管理局着墨唔多，業界對成立新局睇淡，但原來噚日當局向海濱事務委員會委員派咗「定心丸」，透露最快今年底向行會建議成立新局，首要任務係管理中環海濱，未來一兩個月會公布公眾諮詢結果。


Emily聽聞唔少區議員同政黨都想入管理局嘅董事局，但據悉政府暫時想董事局主要由業界人士組成，唔會多過20人，管理局亦無權賣海濱嘅用地，作為起樓等發展用途。但有委員同Emily講，成立新局啱啱處於兩屆立會交接期，時間尷尬，能否通過成立仲有好多未知數。