警車借泊皇仁 學生校友促解釋

【明報專訊】前日「全民拒絕假普選」遊行喺維園出發，位於維園對面嘅皇仁書院就臨時被借用嚟泊警車，有校友質疑警察憑咩可以徵用球場，反問今次可以泊車，之後係咪可以喺官校成立對付示威者嘅部署中心。有學生網上發起學生及舊生聯署，要求校方同警方畀一個詳盡、合理嘅書面解釋，到噚日下晝6點已經有300人聯署。


校長﹕平時好多政府部門借場

校長李瑞華話，官立學校係政府地方，平時好多政府部門問佢哋借場地，如果唔影響日常運作，學校通常都肯幫忙。佢又話警方早幾日已經打電話嚟話要借球場泊車，學校考慮到前日係星期日，同埋呢段時間考試，冇乜學生用球場，所以同意，如果校友有疑問，佢願意解釋。警方發言人話，前日處理港島一個公眾活動，因為要封路同改道，驚路面泊警車會影響附近交通，故借用附近幾個地方泊車，及畀當值人員休息，事前已得到機構同意。


皇仁校友、立法會會計界議員梁繼昌就質疑，警察執行任務大可喺附近路面泊車等候，認為呢單嘢明顯係警察貪方便。佢又話以前七一遊行咁多人都冇呢個情况，但前日遊行得幾千人都要徵用學校，佢仲聽聞有學生想打波都無地方，希望學校解釋清楚。