林濬邊做市建總監邊仲裁

【明報專訊】年屆69歲嘅市建局非執董林濬（圖）喺禮拜一正式轉做一哥，出任暫代行政總監，噚日佢同主席蘇慶和見傳媒就話今次純屬捱義氣，幫市建局完成過渡期嘅工作，佢上任時已講明，唔會應徵日後嘅行政總監，笑稱「我係主席都唔會請個咁老嘅行政總監！」

雖然林濬係暫代性質，但佢仍要滿足市建局嘅利益申報要求。Emily睇過佢嘅利益申報表，雖然報稱無擔任其他私人公司董事職位，但有一欄奇怪咁話，林濬個人仍要處理5宗仲裁個案，同埋係受薪工作，變相一邊做市建一哥一邊繼續兼職。林濬同Emily解釋，該5宗案件均喺2013年前接落嘅，根據法例難以臨時更換仲裁員，並稱已確認該5宗案件與市建局無利益關係，因此仍要繼續進行。對於仲裁個案嘅客戶係邊個，林濬話基於保密原則，不能談論及泄露案情。


另外，佢會繼續做國際仲裁中心及青少年發展聯會嘅工作，佢話兩間都係非牟利機構或團體，與市建局無利益關係，故仍擔任職位。