黃定光立會睇艷女片

【明報專訊】人類總係要犯重複嘅錯誤？繼民主黨立法會議員何俊仁喺立法會會議廳內睇性感女郎嘅照片，搞到要公開道歉之後，民建聯進出口界議員黃定光（象哥）喺噚日審議政改方案時唔知係咪太悶，被拍到用手機觀賞性感少女相，以及穿迷你低胸裙洋妞扭弄動作嘅花式桌球短片。


稱近日各方好友信息來往頻繁

象哥其後同Emily解釋，仲分享短片連結，Emily睇過，片中的確有靚女，但就有花式桌球表演元素，負責表演嘅外籍女仔著低胸短裙，坐或企喺球枱上做障礙物，球手就打波，例如把桌球打到彈起或轉彎，繞過女模身體再擊中其他顏色波入袋。


睇片興趣廣 睇到手機無電

象哥形容所睇嘅只係WeChat上一段笑話短片，內容係啲人打士碌架有幾高超。佢話呢幾日各方好友嘅信息都好頻繁，往來好多，大部分係議會內外嘅情况，但其中有個別友人覺得有趣嘅互傳閱覽，若佢打開，自然會睇得到，至於專唔專心開會，相信傳媒朋友同市民自會有評論。


其實一般市民未必太關心象哥開會專唔專心，但佢老婆就係工聯會會長林淑儀，唔知今次事件會唔會影響兩個建制大黨嘅關係呢？其實象哥睇片嘅興趣都幾廣泛，除咗性感花式桌球，仲有睇一啲似係歌唱表演嘅短片，唔怪得睇到手機都無電，要問黨友借充電線。