香港成僑居成本第二貴城市

【明報專訊】香港不易居？人力資源諮詢公司美世（Mercer）環球生活成本指數調查，今年頭10個外派員工居住成本最貴嘅城市，有5個都喺亞洲，其中香港比舊年升一位，成為生活成本第二貴嘅城市。另外4個亞洲城市分別係新加坡（第4位）、上海（第6位）、北京（第7位）同埋首爾（第8位）。根據份報告，如果以牛仔褲平均價格做例子，香港賣129美元，英國倫敦就賣115美元，而美國紐約只係賣58美元，可以見到香港物價幾咁貴。


貨幣匯率影響大

睇番Mercer嘅分析，影響僑居成本最大嘅因素係貨幣匯率，近年人民幣兌美元有所升值，所以中國嘅城市排名都畀舊年明顯上升，而日圓係咁跌，東京就由原本第7位，跌到去第11位嘞。


香港行聯繫匯率同美元掛鈎，所以排名上升，真係因為啲嘢實在太貴。不過無論香港物價點貴，似乎都未動搖到連續3年排第1位嘅城市，就係西非國家安哥拉嘅首都羅安達，因為羅安達除咗進口產品嘅物價好高之外，仲要因為治安問題，要花高價搵啲安全嘅地方居住。調查包括全球207個城市，以紐約情况做指標，就房屋、交通、食物、衣著、日常用品及娛樂嘅成本作為比較。