立會保安神秘 議員唔識上車

【明報專訊】立法會噚日11點開會，由於朝早已經有唔少示威團體喺大樓外聚集，所以秘書處安排咗專車，由中環舊立法會大樓接載議員到金鐘立法會大樓開會。不過成個安排極神秘，開車前一個鐘，秘書處先話畀議員聽喺邊度上車，有議員以為安排咁密實係因為封咗路，但據聞條路暢通無阻，令議員都有啲意外。


Emily又發現，平時大樓外嘅添美道有好多垃圾桶，噚日都被收起晒，或者同炸彈疑雲有關。雖然無堆積垃圾，但有煙民就向Emily投訴唔知可以喺邊度「打邊爐」（吸煙）。


建制避外出 嫻姐備睡袋

至於離開大樓安排，唔同議員都有唔同打算，好似工聯會榮譽主席陳婉嫻咁，就帶備睡袋，一旦議會被包圍，都可以於大樓留宿。嫻姐黨友黃國健亦話佢一直備有睡袋，唔怕留低長期作戰。


立法會噚日為議員甚至傳媒提供膳食，黃國健就話，建制派都有默契，呢幾日避免會議期間外出，費事外面示威等問題令到佢哋返唔到大樓開會。而新民黨主席葉劉淑儀喺離開大樓嘅時候，就不斷問邊度可以搭專車走，似乎秘書處對前保安局長都一視同仁，無透露保安詳情。


香港表決政改咁大件事，噚日大樓內外中外傳媒雲集，用嚟畀記者擺咪做訪問嘅咪兜更加由一變三。