王征倡炒CY張曉明問責

【明報專訊】政改方案噚日好戲劇性咁被否決，責任誰屬？唔同人有唔同睇法，無得續牌嘅亞視主要投資者王征，噚日就喺微信留言，大膽建議中央立即撤換特首梁振英同中聯辦主任張曉明，以示問責。


亞視無得續牌呢個決定，就係梁振英會同行會拍板，痛失牌照嘅王征，噚日見到政改方案否決咗，乘機抽吓水。喺微信叫做「盛世佳人」嘅佢留言話「敵人並不強大，卻成國際醜聞」，仲話大家多年嘅心血付諸東流，沉痛心情非言語所能形容。


佢提出問責方案，「斗膽建議中央，仿當年撤董之舉，長痛勿如短痛，立即撤換特區行政長官梁振英先生及中聯辦主任張曉明先生，以示問責，以儆效尤，重新出發」。


如果政府推銷政改失敗要問責、要梁振英下台，咁亞視續牌失敗，係咪都應該有人問責下台呢？