郭偉強﹕表決一刻離場

【明報專訊】建制派「蝦碌」令政改僅得8名建制派投票支持政改，除咗蝦碌因由，唔少人都關注留喺會議廳但選擇唔投票、唔按出席掣，只係呆坐會內嘅勞聯潘兆平。Emily呢兩日睇過多條表決一刻嘅短片，發現最後影到潘兆平嘅一個鏡頭，竟然發現當時仲有工聯會郭偉強喺度，唔通郭偉強都冇跟大隊走，仲留喺會議廳？


據現場片段見到，按掣一刻只係影住泛民議員同官員，之後亦無人影到潘兆平同郭偉強，建制派拉隊走出會議廳，人群裏面亦見唔到郭偉強。工聯會陳婉嫻前日同Emily講，佢曾叫過郭偉強留低，噚日仍然話郭偉強當時都留低咗。


Emily問阿強，佢話嫻姐都搞錯咗，佢喺主席宣布表決時最後一刻先離開，佢話因為當時計算，覺得佢走咗就會令會議廳得34人，啱啱好唔夠人開會就可以休會「等埋發叔」，希望自己幫到手，點知都係計錯數，而同潘兆平咬耳仔，都係講緊夠唔夠法定人數問題喎。


麥美娟備英文講稿 惜無機會發言

政改辯論裏面，工聯會6個議員只係得王國興一個發言，Emily聽聞唔少人其實一早預備咗講稿，但最終因為建制「失誤」而冇機會留言。其中中大英文系畢業嘅麥美娟更寫咗英文講稿，希望向國際社會表達，其實主流民意都好撐通過政改，唔係只得泛民啲bite可以用，可惜最後都無留下呢個歷史紀錄。