龍舟嘉年華首辦海上拔河

【明報專訊】香港龍舟總會主辦、旅發局合辦嘅龍舟嘉年華，下月3至5日一連3日喺尖東舉行，市民除咗可以喺維港岸邊睇龍舟比賽，睇下今年新增嘅龍舟海上拔河，仲可以去尖東市政局百周年紀念花園嘅啤酒節飲啤酒，場內有懷舊佈置，畀人影相「打卡」，仲有得食啤酒味雪糕。


今年旅發局用「大買、愛吃、玩不停」做夏季推廣主題，嘉年華既龍舟邀請賽喺維港舉行，有410隊嚟自13個國家或地區嘅龍舟隊參加，旅發局節目及旅遊產品拓展總經理洪忠興話，有本地龍舟隊經費唔夠而無參加，比上年少咗16隊，估計可能因為搵唔到贊助機構，實際原因要問番佢哋。


啤酒節有啤酒味雪糕

國際隊就多咗10幾隊，有隊伍嚟自爆發新SARS嘅韓國，洪忠興相信佢哋入境時會確保無感染。如果市民覺得太熱，可以去啤酒節，主辦公司會推出啤酒味雪糕，唔知未成年嘅朋友仔食唔食得呢？


上年盛事基金畀審計署批評贊助太多持續或重辦既活動，其中龍舟嘉年華自2010年起連續多年拎到贊助，盛事基金今年繼續批550萬畀龍舟嘉年華，佔嘉年華經費逾四分之一。商務及經濟發展局覆Emily，話嘉年華符合各項申請條件，所以攞到基金贊助。