郭偉強父親節拍片 盼盡快造人

【明報專訊】唔少立法會議員噚日都趁父親節為天下父親送上祝福，今年剛剛結婚嘅工聯會立法會議員郭偉强就拍片向父親表心意，仲話會急起直追，「希望我好快做人哋嘅爸爸」。


郭偉强搵咗幾個小朋友一齊拍片，向父親們致謝，啲小朋友喺片中又飛吻、又向爸爸講身體健康，多謝爸爸平日辛苦養家。唔知郭偉强見到係咪好羨慕呢，佢自己喺片中都有分享細個同爸爸相處嘅點滴，仲話爸媽令到三兄妹都可以順利成長，擁有自己嘅家庭，「我哥哥、妹妹更有自己嘅小朋友，我都會急起直追，希望我好快做人哋嘅爸爸」。


郭偉强又話，近日有接觸關注男士權益嘅團體，關注男士健康同權益問題。佢有一個諗法，希望可以成立男士事務委員會，促請政府盡快研究可行性。