李達三1億捐中大 新中心研中醫藥

【明報專訊】中文大學近來收到樂聲物業投資有限公司董事會主席李達三捐贈1億元，成立咗「李達三葉耀珍中醫藥研究發展中心」，主力研究華南地區中藥。中心主任、中大生命科學學院教授邵鵬柱話，近排韓國中東呼吸綜合症（MERS）肆虐，其實好多華南中藥都有抗炎、抗菌、抗病毒功效，佢哋將成立一個資料庫，研究同記錄中藥嘅藥用價值，可能對治療呢類病有幫助。佢又話，南方人鍾意飲涼茶，熱氣又飲、感冒又飲，以科學驗證方法鑑定藥物成效，可進一步證明係咪真係有效。


呢1億元除咗用嚟做研究，仲會用嚟收集同整理藥材，一部分喺中大種植，一部分會上華南蒐集，又會為本地中藥業界及國際中醫藥研發人員安排講座同提供培訓，推動香港中藥業及高科技產業發展，仲會同英國倫敦皇家植物園邱園合作，因為佢哋嘅資料庫對藥材搜集、鑑定同成分分析都非常豐富，可以一齊舉辦訓練課程同蒐集藥材，互相交流，增加經驗。