卿姐病失聲 拉住高永文開藥

【明報專訊】民主黨主席劉慧卿因為早幾日冷親，搞到感冒失聲走音，卿姐噚日喺立法會一見到食物及衛生局長高永文，就即刻拉住高醫生，叫高醫生開藥醫病，高醫生雖然未有即場睇症，但都問候咗卿姐兩句。卿姐話其實佢已經睇咗中醫，希望食啲川貝可以改善聲線。


卿姐聲沙失聲都特意返議會開會，因為佢話要討論去年立法會代表團出訪芬蘭、挪威同丹麥嘅訪問報告，仲講足十幾分鐘絕無欺場。卿姐話，丹麥國會嘅執政黨同反對黨，會分配26個委員會主席嘅職位，當中有10個主席位由反對黨擔任。佢話反觀香港，泛民主派永遠唔可以執政，而立法會亦難以發揮監察政府嘅功能。