議員傾改善泛民北京關係

【明報專訊】民主黨涂謹申噚日喺立法會就「後政改」時期，提出關於如何改善泛民同北京關係嘅質詢，政府方面無新意提出，只係一味話贊成多啲溝通。反而立法會議員就有新穎意見提出，好似民建聯蔣麗芸（Ann姐）建議安排議員返內地輕輕鬆鬆周圍行吓，了解國情；公民黨毛孟靜（Ms Mo）就反建議邀請京官去立法會嘅飯堂，同議員好好傾吓。


Ann姐建議政府日後可唔可以安排一啲長時間嘅內地團，等議員可以輕鬆地周圍行吓。署理政制及內地事務局長劉江華就話，好贊成議員同中央官員要多啲溝通，又指溝通都可以用唔同方式。


毛孟靜反建議京官去立會飯堂

Ms Mo都話香港需要新開始，認為可以由議員邀請京官來港，喺立法會飯堂、會展等地好好傾吓，但一定唔可以去中聯辦。Ms Mo亦講明，全體立法會議員被召去深圳，受京官訓話嘅溝通方式，係唔可以接受。